سفرنامه بسیجی

دسته: اشعار
بدون دیدگاه
چهارشنبه - ۲۱ تیر ۱۳۹۶

الله آدیلان باشلورام سوزومی
یاری تاپوب ایتیرمیشم اوزومی
دایان قلم قوی بیر سیلیم گوزومی
یوخدی دوزوم آغلا گوزوم،آز آغلا
آغلاساندا غیرت سوزون یاز آغلا
عومور گئچور انسان ئوزون ایتیریر
گور معرفت سنی هارا یتیریر
شرطی بودور باج ویرمیاخ شیطانا
مومن اولاخ گویدن گلن قرآنا
جانلار چیخار جانان سسی کسیلمز
دل لال اولار وجدان سسی کسیلمز
بو ئولکه دن قرآن سسی کسیلمز
بوغاز یولون بوغوض دوتار تار چالار
سوزده اثر اولسا داشی پارچالار
ایللر اولور ایتیرمیشم ائللری
آختاریرام داغی داشی چوللری
هایاندا سیز آی یوردومون گللری
گویلوم ایستور قناد ویرام پر آچام
اورکلرده سوز قوشونا یر آچام
اوخوموشام حیدربابا کتابین
شهریارین گزمیشم خشکنابین
بوینوما سالمیشام تقلید طنابین
باتیردیم جبهه ده خامه می
یار عشقینه یازام سفرنامه می
گیدنلرین آدی ایتگین قالماسین
عکسلرین دوسلار یره سالماسین
قالانلاری الله بیزدن آلماسین
اولمیان ایشلری گلین اولدوراخ
شهیدلرین بوش سنگرین دولدوراخ

دوز ایتیریب دیمه یولدان آزارام
قلمیملن ئوز قبریمی قازارام
ای مدعی یا کس منیم دلیمی
یا آچیق قوی قلم دوتان الیمی
آی بختمون قوشی اویاندیر منی
آل قنادین اوسته دولاندیر منی
هویزه ده بیر آز یوباندیر منی
عاشقلرین بیرده سسین ائشتدیم
کفنسیزلر زمزمه سین ائشتدیم
یادان چیخان خاطره لر یاد اولسون
ویران قالان صومعه آباد اولسون
شیرین سوزه مشتری فرهاد اولسون
داغلاردا آز داشا چالسین تیشه سین
هرای چکوب باشا چالسین تیشه سین
دردیم چوخدی هراسندان دانشیم
قیراقندان آراسندان دانشیم
اورگیمون یاراسندان دانشیم
ضبط ایلیون آی ایشیدن قولاقلار
یوخلامیون آی وجدانی اویاقلار
آی قلمیم نقیل دیمه سوز دانش
نظمین رشته سینه سوزی دوز دانش
بهلول کیمی ایری اوتی دوز دانش
یالانچی نین هیچ یرده پستی یوخدی
هر کیمین پستی یوخدی دوستی یوخدی

آی جبهه لر قهرمانلار نجولدی
دشمن صفین سندیرانلار نجولدی
قزل گوللر گلستانلار نجولدی
پیچاق ورسان داماریمنان قان چخماز
سنین آدین منیم یادیمدان چخماز
قورخولی ایل مین اوچ یوز الی دوقوز(۱۳۵۹)
چوخ ننه نی صدام قویدی اوغولسوز
آچیق دیسم سووا دونر دمیر بوز
مرزی آشوب یورش طبلی چالدیلار
آز زماندا خرمشهری آلدیلار
بی دینلرین خیانتی بیر یاندان
بنی صدرین حماقتی بیر یاندان
قاباخدا قانلی دشمنلر دوردیلار
دوسلار داکی دالدان قلج وردیلار
هندین نسلی گور جنگیده نیندی
بنی حمزه نین جگرین چیندی
بیردن خمینی نین قانی قیندی
دیدی حسین کیمی قانا بویانوق
یرمی ایلده جنگ اولسا بیز دایانوق
حقدن گلدی او سیدین نفسی
کفن گیدی کیم ایشیتدی بو سسی
کربلانین دیریلدی خاطره سی
غیرتلی لر دیندن دفاع ایتدیلر
اوغولار ننه دن وداع ایتدیلر
آنا سو سپدی اوغلونون یولونا
و ان یکادی باغلادی قولونا
دیدی گرک حقدن دفاع اولونا
گوزللرین چوخی گیتدی گلمدی
جنازه سی چولده ایتدی گلمدی
بیز اوندا که ائلی گوزدن آتارودوخ
خرم آباد محالینا چاتاردوخ
فلک الافلاکدا گئجه یاتاردوخ
یوخلامامیش تلسردیق صبح اولا
تئز نمازی قلیوب دوشردیق یولا
اندیمشکین دوزی شوشتر جاداسی
گونوز ایستی آخشام سرین هواسی
دو کوهه ده پادگانین نماسی
تهرانیلار اوردا قورموشدی خرگاه
پرچملری محمد رسول الله
آغلا گوزوم یولاری تئز تئز سولا
توز ایچینده تئز یتیشاق دزفولا
دزفولولار دینی ساتما پولا
پوکادان طاق نصرتی گور گیداخ
دانیال پیغمبره سلام ویر گیداخ
هیچ بلمورم هانسی زماندان دیوم
بهاردان باشلیوم خزاندان دیوم
چزابه دن یا دهلراندان دیوم
دشت عباسین آثاری باستاندی
اوزیچون بیر مفصل داستاندی
نجولدولار قرمز پرچم آچانلار
مین اوستونده ایاق یالین قاچانلار
ترکشینن گل سینیه ساچانلار
بیر الده قرآن بیره الده اسلحه
اولار یادان چیخسا بیزه فاتحه
جگریمون بندین قیرار پارالار
ائللریمین اگننده کی قارالار
جانبازلارین بلنده کی یارالار
بعضی ایلده اوچ یول گیدر عمله
الله سبب سالا حالی دوزله
اویون چاتماز عاشقلرین اوینونا
بسیجی لر چپی دولار بوینونا
دالدا قالان الین قویار قوینونا
ای آیریلیق کاروانی یواش گیت
سن بیل شهیدلرین قانی یواش گیت
سکز ایلده منده موفق اولدوم
بش اون سفر عشق اهلینه قوشولدوم
یورولمادی عاشقلر من یورولدوم
جبهه دیمه گللی گلستانیدی
هر طرفه ایاق قویدوم قانیدی
انرژی ده تاپدیم عشقین گوهرین
علی بن ابیطالب لشگرین
بویوک بیر مسجد یانندا دفترین
اذان دییلمه میش گورردیم دولوب
صورا بلدیم یانوب اودا کول اولوب
ایستی یولدا سوسوزلوقون لذتی
صلواتی ایسگاهلارین شربتی
الله توکوب باشمیزدان نعمتی
قوجا جوان بیر بیرینه قاریشوب
کوسولوده اولسا اوردا باریشوب
مجنون یولی حسینیه سه راهی
جزیریه گیدنین قتلگاهی
خیبر جاداسندا علی سپاهی
توپ دوشنده سویون موجون اوتالار
گوله گوله تورسوز بالیق توتالار

یادیمدادی عمرون شیرین گونلری
احدی نون یر آلتندا سنگری
حاج میرزعلی موتور اوسته اشتری
حاج اصغرین هی ناصرجان دیمه سی
آغلاماسی گولمه سی زمزمه سی
جزیره دن قییدیردیق اهوازا
غریبلو باسمیشدی ایاقین گازا
بیر توپ دوشدی ماشین گلدی پروازا
علی زیبا وجعلنا اوخودی
یان دوره ده شهید اولان چوخودی
توز ایچینده آلا گوزلر سرمه سی
گیوه ای نین اویاندا اوسگورمه سی
حاج احمدین بولدور یری سورمه سی
جان نثاری گوردوق قرمز دون گیوب
صورا بلدیق آننا ترکش دگوب
قینر نجه باغا بولاقلار گلر
حمله گونی سسه قوناقلار گلر
اهواز هریاندان قوناقلار گلر
گلن دیر سیزه مولا یار اولسون
علی کمکلری الوز وار اولسون
سردارلارین میداندا سان ویرمه سی
باکری نین قایقده جان ویرمه سی
بعضین ایشتمیشم بعضین گورموشم
یولداش دیمه گوهر الدن ویرمیشم
چوخالدیر دردیمی سوزون چوخلوقی
عمرون آزلیقی فرصتین یوخلوقی
مرتض حیدری نون مننن شوخلوقی
یاتما اویان نماز وقتی یتیشدی
دستمازی آلاق گزاق بهشتی
فطیر گونی اوزلر گولن دقیقه
بیزه مهندس کسدی بیر عقیقه
دچار اولدوخ نچه قانسیز رفیقه
علی مولائیه جگر چاتمادی
خلیل حرصندن گئجه نی یاتمادی
خرما پزاندا ایستی بیداد ایدر
اهوازین هواسی مغزی قیندر
طاقتی اولمیان تئز حالدان گیدر
تر توکوب صداما یامان دیردیق
عرق گیری سیخوب گینه گیردیق
واکسن ویردیق خرمشهره گیرنده
خلوتیدی پر ورموردی پرنده
دیسگندیق دمیردن جنگل گورنده
قورخوسوندان دشمن نقشه چکمیشدی
شهرین تیر آهنین یره اکمیشدی
گلزار چرندابی آذربایجانلی
هامی اونا دیر محمود زنجانلی
جنگ باشلاناندان اولدی خوزستانلی
هر یانا ائل گیتدی اودا سوروندی
دجله کنارندا قانا بوروندی
عاشورا لشکری اسکو چورگی
سحر وقتی سوندورر اورگی
غیور عشایرین انی کورگی
یادا سالار رستمین هنگامه سین
درویش اوخور فردوسی شاهنامه سین
قجریه کندی کارون قیراقی
اوردا یانار غواصلارین چراغی
چاقالارین گئجه لر قیشقیراقی
صبحه کیمی قویمازدی راحت یاتاخ
مجبورودوق سسلرینه سس قاتاخ
بو طرفده المهدی جانبازلاری
او طرفده حبیبین سربازلاری
نماز وقتی نیاز لاری نازلاری
عاشقیدیم قولاق دیبی سوزلره
گوزوم قربان گولله دگن گوزلره

تیپیمیزده مصلح آدلی طلبه
تشویق ایدر بیزی نماز شبه
الماسی پیشنماز اهل ادبه
روحانی لاری بیر بیریندن گوزل
سوزلرنده هم علم وار هم عمل
حاجی رضا گئجه که دینجلردی
اوغلی ئولن ننه کیمی ملردی
سسی بیزیم چادرادا گلردی
ابوالفضل دیردی دورون مشق ایداخ
صبحه کیمی تپیک وراق عشق ایداخ
بیرگون گیتدی سد دیزه بربری
ایکی شی گتوردی اولدوخ مشتری
هم منیم چرخیمی هم دمیللری
ورزشکارلار آراسندان قاچدیم من
صلواتی خیاط خانا آچدیم من
ایتدی گیتدی داماغ چکن گونلریم
شرمنده لیقدان تر توکن گونلریم
او تلیسلر سودا اولدی استتار
حمام سویینان الی بوش دوست توتار
کیم ایشدوب من ایشیدن هایلاری
مخابرات چادرینون چایلاری
کیفه باخدیق هفته لری آیلاری
بیر دسته گل او چادردا جمیدی
همیشه چایلاری تازا دمیدی
یعقوبعلی گردانین خط شکنی
دیردی گیدیم قرمز کفنی
من غواصام قوی آپارسین سو منی
گوله دگدی سودا باتدی قانینا
گتدی شهید قارداشینون یانیا
بیر چادردان همیشه های چیخاردی
کشتی گیرلر بیربیرینی یخاردی
قابلامانی باقر گویه سیخاردی

رضا مهدی رضایی یادش بخیر
غواص قهرمان جهادش بخیر
ابراهیمون گوزل حسنی شهرتی
اخوانین اوجا رشید قامتی
شفایی نون صفاسی گرمیتی
تعریفلرین یازا بلمز قلملر
قبرلری اوسته اسر علملر
بیر گئجه سو دولدی بیزیم چادرا
زحمت اولدی مصطفیا نادرا
حاج ممدلی دوردی الین باتیرا
چکمه نی گیدی پالچیقا بولاندی
صبحه کیمی بئل النده دولاندی
مش خلیلون گوله گوله صحبتی
بیت اله نین غملریلن الفتی
تفریشینون مرشد اولان ساعتی
دمیللری اوینادار پهلوانلار
رفیعی چرخ گیدر گولر جوانلار
احد مقیمینون ستاد سنگری
ویرانه چوللرده آباد سنگری
عقیده اهلینه جهاد سنگری
او سنگره یغیشاردی قوناقلار
انصارالحسیندن گلن اوشاقلار
نجولدی بس چولده چادر قورمالار
گئج یاتمالا تئز نمازا دورمالار
ترکش دگن نخللرده خرمالار
الله او خوش خاطره لر نجولدی
گوزوم گورن منظره لر نجولدی
گون چیخاندا افقللاردا پرتولار
آلچاق اوجا جادالاردا خودرولار
دونوکلرده بلندگولار تابلولار
فارسی یازوب لبخند بزن برادر
ترکی یازوب یورولماسین دلاور
ماشینلار اوندا که یولا دوزولر
کروان گیدر الیم الدن اوزولر
گوزوم یاشی سقلیمدن سوزولر
سو سپرم گیدن ائلین دالیجا
آه چکرم جوشقون سئیلن دالیجا
نقدری یالواردیم سردار ممده
تا منه ده غواصلیقی ئورگده
دیدی سن قال گلیم گیداخ مشهده
نینرم سن ایتسن بلا چولونده
یخم قالار نوحه خوانلار النده
گوردوم کسوب قاچاق یولون ضابطه
منصور عزتینی سالدیم واسطه
ضابطیه غالب اولدی رابطه
گئجه ساعات بیرده مراده یتدوق
شلمچیه یوک ماشینندا گیتدوق

قرانقولوق یولدا یاندیم آلشدیم
یوسف قربانینن بیر آز دانشدیم
سائل کیمی اتگندن یاپشدیم
دیدی ئولسم کیمیم واردی آغلیا
شاید بسیجی لر عزا ساخلیا
یاری گئجه سه سنگری دوشوردوخ
قبیرسیز یولداشیملا دردلشردوخ
بیربیرینون اورگینی دشردوخ
نه بلیدیم سحر قانا باتاجاق
جزیره ده قان ایچینده یاتاجاق
یادیمدادی اله حنا یاخمالار
جلوه لنن جمالارا باخمالار
بارماقدان بارماقا اوزوک تاخمالار
گیدن قارداش یولداشی گوزدن آتما
شفاعتده منی یادان چخاتما
سنگرلر قیراقی بایرام آخشامی
منور ایشقی نینیرم لامی
عملیات وقتی شهید بایرامی
بسیجی لر هر یانا گل سپللر
بیربیرینون اوز گوزوندن ئوپللر
غم باسمیشدی شلمچه نین هواسین
گیینوردی غواصلار ئوز لباسین
آلوردی یولداش یولداشین قاداسین
شریعتی باش چکوردی هر یانا
خط گزوردی مصطفی مردانه
گون باتوردی اذانا آز قالوردی
گویدن یره طیاره بمب سالوردی
بی سیم الده دولانوردی ملکی
آیریلمقا تلسوردی اورکی
نوعی اقدم ایکی شهید قارداشی
یامان گونده جمال اونون یولداشی
یارالاندی هم بوغازی هم باشی
قان ایچنده باشلارینا دولاندیم
الله بلور ئوز ئوزومدن اوتاندیم
چای سیزیدوق حسین تاپدی بیر چراغ
اوندا سو قیناداخ ایچاق تئز دوراخ
سو قینین وقته گوزوزدن ایراغ
بیر بمب دوشدی قابلمامیز جالاندی
اوصانلودان سوروش دیمه یالاندی
گتدی ویروب الندن هر نه واری
چوبان آتوب ئوز باشینا داواری
تبلیغاتدا آهنگران نواری
پاسدار دیر جانم فدای رهبر
سرباز دیر یک یا حسین دیگر
باشدان اوجا خاکریرلرین دوره سی
گوزللرین آری کیمی پوره سی
گاز ویرنده تانکین اوجا نعره سی
قیشقیراندا قولاقلاری قوورار
هیلی کوپتر باشا تپراق سوورار
خط شکنلر غرض دولدی کانالا
مین کتاب سوز یازام گرک او حالا
مشهد ابوالفضل منی قیتردی دالا
حاج صادق یولدا یارالی گوردوخ
یولداشلاردان اونی آرالی گوردوخ
عملیات سحر تمامه یتدی
هر گردان ئوز مقرینه قیتدی
بیزیم اوشاقلاردان بیر عده ایتدی
باوریم اولماددی اورک قانمادی
چوخ چادرین فانوسلاری یانمادی
غواص دیدیم دوشدی بلم یادیما
فاوین شهرین سالدی قلم یادیما
گلدی بیردن یاشیل علم یادیما
یری مسجد منارینون قله سی
چخدیم سایدیم واردی یتمش پله سی
بسیجی لر فاودا قالان گئجه لر
نمک کارخاناسین آلان گئجه لر
قایقلری سووا سالان گئجه لر
بیر کشتی گوردوم اوردا باتمش گله
ناخداسیز بورون ویروب ساحله
سووا باخدیم گوردوم سسی تانیشدی
من دینمه میش ئوزی دانیشدی
یارالی غواصلار بوردا آلیشدی
هیچ ساحله بیر عده سی چیخمادی
باشین باسدی سووا سسی چیخمادی
قایق اوسته یورما منی گئچ قلم
هارا گیتسن حقیقتی سئچ قلم
جنوب سوزون یازا بلمز هئچ قلم
گیداخ غربین باغلارینی دولاناخ
بیستونون داغلارینی دولاناخ
کولاپشتی دالدا جهاد اردوسی
نجف لشکرنده زنجان نیروسی
دکترلرین تنظیفلری داروسی
دیللر کاش یارالیمیز آز اولا
یوخوسوز قالانلار حالی ساز اولا
دزفولدان بیز گلنده کرمانشاها
گوردوخ دژبان دمیر آتوب سه راها
اسلام آباد بنزیردی قتلگاها
منافقلر یخلمیشدی یان یانا
جانی چیخسون چپ باخماسین ایرانا
ال اوزی توزلی گوردوم بیر السیزی
آخسیا آخسیا آشپز خاکریزی
بسیجیدی یارالیدی بیر دیزی
دکترلر صولتین گوروب اسدیلر
قولسوزودی قیچینی دا کسدیلر
بولار بیزیم حیثیتی ساخلادی
مملکتده امنیتی ساخلادی
هم قرآنی هم عترتی ساخلادی
گوز تله شاق وحدت الدن گیتمه سین
با هم اولاق غیرت الدن گیتمه سین
رزمنده لر تولکیه تور قوردولار
اصلان کیمی قاباقیندا دودولار
مهاجمی قاچیرتدیلار یوردولار
جن بسم الله ایشتدی گوزدن ایتدی
یازیق مهاجرلر ایوه قیتدی
داغلار دوشونده قهرمان بسیجی
دشمنه ویرمزدی امان بسیجی
هرای فلک اونی یادا سالان یوخ
بعضیسینون سلامنی آلان یوخ
اوروجلوق گونلری احیا گئجه سی
شهادت مجلسی غوغا گئجه سی
اولموشدی عینا عاشورا گئجه سی
سید یوسف شیرین نوحه دیردی
حاج امامی سینه سس ویرردی
بانه یولی سیزلتیلار ناله لر
داغلار دوشونده قرمزی لاله لر
قزل گللر اوستونده کی ژاله لر
داغ باشیندا قوجا چوبان نی چالار
رزمنده گوروب گولر هی چالر
چوبان قارداش بسدی بوشلا سارانی
گیه جاقسان نه وقته چان قارانی
اوبا کوچدی غم آلدی آستارانی
ایشتدیقیم روایتدی یالاندی
گوزوم گورن حقیقتدی قالاندی
آی تئز آخان ستاره لر هارداسوز
گویده چاپان سواره لر هارداسوز
الی ایاقی یاره لر هارداسوز
آختاریروخ ایتیرمیشوق سیزلری
هرا گیتدوز آپارمادوز بیز لری
سینه میزی نجولدی داغلیانلار
قرمز پارچا آننا باغلیانلار
یا رب دیوب یواشدن آغلیانلار
غم الندن داریخدیلار گیتدیلر
دمیر قفسدن چخدیلارگیتدیلر
رد اولون آی گوزومده کی پرده لر
گوروم آزادلیقا چخوب برده لر
یاتمیون ای غیرتلی سرکرده لر
گورمیوم روزگاریده خوار سیزی
گوزلریندن چوخ ایستردی یار سیزی
اوجا داغین تیکانلاری کولاری
سنگرلرین بوروخ بوروخ یولاری
عاشقلرین اوردا دوشن قولاری
نامرد بعثی لر کمینده یاتدیلار
چوخ شهیدی گویدن یره آتدیلار
سلیمانیه شهرینی آلانلار
شیمیائی آراسندا قالانلار
دومان ایچینده ال ایاق چالانلار
اورکلر ملکونه علم ویردیلار
قان گوجونه شمشیری سندیردیلار
گون یتشمز جانم ، گئچن گونلره
ننه بیزه کفن بیچن گونلره
ایستیده سرین سو ایچن گونلره
اوجوز اله گتورمدیق ایرانی
هر قدمده بیر شهیدین وار قانی
سقز دره سینون آخار چایلاری
پاییزلاری بهارلاری یایلاری
شادلیق گونی جنگین آخر آیلاری
قوجالار ئولدی جوانلاری قوجالدی
شهید ویرنلرین باشی اوجالدی
شهیدلر که آدلاینی دیمیشم
هامیسینون دوز چورگین یمیشم
او بیرسی لردن دیمه اینجیمیشم
کول باشما چوخی دوشدی قلمدن
عذر ایستورم هامی اهل قلمدن
معبودی لرکریمی لر مکی لر
گوزلینلار بیاتلار نقدی لر
اوجاقلولار صمیمی لر میری لر
قبرلرین قلم اورکده قازوب
من یازماسان آدلارین الله یازوب
گویلوم ایستوردی الده اسناد اولا
شهیدلرین هامیسیندان آد اولا
مندن صور مجلسلرده یاد اولا
سوز اوزاندی دلده طاقت اولمادی
ئوزلری شاهدی فرصت اولمادی

زنجاندا من بش آلتی گون مهمانام
((کلامیم)) مستحق احسانام
حسین یولون گیدنلره قربانام
غصه لنمه ای عاشق حسینی
تادنیا وار یادان چخماز خمینی
تسلطین اولسا اگر ابجد
آلتی پله چخسان چاتارسان صده
ایتیردیگون تاپ ((جنگلین جبهه ده ))
سوروشما سوز نچه مخمس اولدی
عدد چخدی دوقسان دوروه بس اولدی
****
به حساب ابجد((جبهه و جنگ))مساوی با۹۴می باشد.

شاعر:استاد ولی الله کلامی


پرینت اشتراک گذاری در فیسبوک اشتراک گذاری در توییتر اشتراک گذاری در گوگل پلاس
بازدید: ۸۰